एउटा ७ वर्षे बालकको जिज्ञासा!

 आमा! 

बाहिर वायुमण्डल तुँवालोले ढाक्दा

पल्लो डाँडामा भएको भव्य पिपल बोट नदेखिँदा

हाम्रो त आँखा पोल्छ, आँसु आउँछ

फोक्सो फुल्छ रोग लाग्छ र दु:ख हुन्छ

आमा!

मलाई मास्क र चस्मा लगाउ भन्दै गर्दा

वायु प्रदुषण भनि पाठशाला बन्द गर्दा

त्यो पिपलको बोटमा बस्ने ढुकुर के गर्छ होला?

बाँसघारीको डाङ्ग्रे कहाँ जान्छ होला?

टुनीको हाँगामा बस्ने ढुकुरले मास्क लगाउँछ र?

काग र कालिज बचेरालाई खाना नखाउलान् र?

आमा!

म बाहिर धुवाँ छ भन्दै नखेलेको दिनौँ भयो

के टिउराहरू नि पौडेका छैनन?

के मृग सावकहरू वन शयर गरेका छैनन?

छावाहरू पनि भित्रै होलान् र?

आमा!

पशु र पन्छीका पनि त आँखा पोल्लान्?

स्वाश कोशिका बिग्रेलान्

हामीसँंग पो डाक्टर र वैद्य छन्

उनिहरू कहाँ जान्छन्?

उहि पवन उहि जल र उहि थलमा 

हामी किन उपद्रव?

अनि उनिहरू किन मौन?

आमा! 

मान्छे के पशु जस्तै बन्ला?

फोहोर, धुवाँ र धुलो निकाल्न छोड्ला?

पुरानो पृथ्वी, हरियाली र स्वच्छता आउला ?